4

കൊച്ചി: മൂവാറ്റുപുഴ നഗരസഭ ഓഫീസില്‍ മരപ്പട്ടി ശല്യം. മുന്‍സിപ്പല്‍ സെക്രട്ടറിയുടെ ഓഫീസ് മുറിയിലാണ് സീലിംഗ് തകര്‍ത്തു രണ്ടു മരപ്പട്ടികള്‍ എത്തിയത്. മുന്‍സിപ്പല്‍ സെക്രട്ടറി മീറ്റിംഗിനായി പോയപ്പോഴായിരുന്നു മരപ്പട്ടികള്‍ എത്തിയത്. മുറിക്ക് അകത്തുനിന്ന് അസാധാരണമായി ശബ്ദം കേട്ടപ്പോള്‍ ജീവനക്കാര്‍ തുറന്നു നോക്കുകയായിരുന്നു.

ഓഫീസ് മുറിയില്‍ കയറിയ മരപ്പട്ടികള്‍ കസേരയിലും മേശയിലുമായി സ്വതന്ത്ര വിഹാരം നടത്തുകയായിരുന്നു. ഇതു നഗരസഭ ജീവനക്കാരില്‍ പരിഭ്രാന്തി സൃഷ്ടിച്ചു. വനംവകുപ്പ് ഉദ്യോഗസ്ഥര്‍ എത്തിയാണ് മരപ്പട്ടികളെ പിടികൂടി ചാക്കിലാക്കി കൊണ്ടുപോയത്. മരപ്പട്ടികളില്‍ ഒന്നു ഗര്‍ഭിണിയാണെന്നും വനംവകുപ്പ് ഉദ്യോഗസ്ഥര്‍ പറഞ്ഞു.